EDELWEIßPIRATE
Musik: R. Hömig, Bläck Fööss
Text: R. Brings
Verlag: De Bläck Fööss Musikverlag GmbH
Jahr: 1983


1. En Tafel us Bronze am Bahndamm anjebraat,
irjendeiner hät 'ne Struß Blome hinjelaat.
Em Spillzeuglade vis à vis en Draumwelt, schön un bunt.
Der Wind driev Rän üvver d'r Platz, wo ens d'r Jaljen stund.

2. Domols, als en brunger Nach de Freiheit es verreck,
e janz Volk wood en en Uniform jesteck,
do blöhte en unserer Stadt e Blömche, fies jeropp,
doch dat jing nit en trotz Hokekrütz un Dudeköpp.

Refrain:
Edelweißpirate, su han se sich jenannt.
wo dat Blömche jeblöht hät, jo, do wor Widderstand.

3. Mit Jittar jäje Nazimarsch, su fing et domols an.
se woren jäje Hitlerjroß un Häreminschewahn.
Se wullten kein HJ-Montur. Se wullten keine Drill.
Se fuhren rus en de Natur un spillten Buffalo Bill.
Als dann 39 die Häre maaten Kreech,
wor inne jäjen et Edelweiß jedes Meddel räch.

Refrain:
Edelweißpirate, su han se sich jenannt...

4. En Brauwieler un em EL-DE-Huus brutal zosammejewichs,
dat manch einer noch e Kind wor, drop joven die Henker nix.
Die, die sich nit zerbreche leete, woßten, jetz es Schluß,
beim nächstemol, do simmer dran, mer künne nit mih noh Hus.

5. Met Junge us dem Ungerjrund han se sich versteck.
Se kläuten Foder un Wasser, söns wören se verreck.
Se han och Nazis ömjelaat, su wick hät mer se jebraat.
Em Oktober '44 wood e Deil vun inne jeschnapp.

Refrain:
Edelweißpirate, su han se sich jenannt...

6. En Tafel us Bronze, am Bahndamm anjebraat,
irjendeiner hät ene Struß Blome hinjelaat.
Et Levve, dat jeit wigger, weiß Du, wat domols wor?
Vun denne, die he ömjebraat, wor der Jüngste 16 Johr.

Refrain:
Edelweißpirate, su han se sich jenannt...

Edelweißpirate, su han se sich jenannt,
doch dat weed en keinem Schullboch hück jenannt.

© BLÄCK FÖÖSS