Musik: H. Knipp, Bläck Fööss
Text: H. Knipp, Bläck Fööss
Verlag: De Bläck Fööss Musikverlag GmbH
Jahr: 1979
1. Wo dä Qualm vun d‘r Chemische Kalk jeden Daach op die Hüser fällt
do es hä jebore, do kennt hä sich us, he es sing Welt.
He jing hä zur Schull un späder beim Humboldt en de Lihr.
Un des Ovends trof hä sich off met Fründe zum Bier.
2. Eines Daachs op dem Wäch zor Kantin, hä wollt Meddach maache jon,
do soh hä e Mädche, dat jrad met e paar Akte zur Düür ruskom.
Hä jing op et zo, un saat: Süht mer dich jetz öfter he?
Do sat et: Nä, nur zwei Mond, ich ben nur zur Aushilfe he.
Refrain:
Dä Manni us Ossheim wor Schlosser am liere,
it kom us em Hahnwald, hieß Ute un fing jrad eets an ze studiere.
Dä Manni us Ossheim, dä hät et probeet
un daach sich et Ute un ich, jo dat es janz bestemmp nit verkeet.
3. Met d'r Zick kom et dann och su wick, dat se sich joot verstande han,
se jingen off danze, fuhren en et Jröne su dann un wann.
Dat jing alles joot, bes hä sich em Hahnwald vürjestellt,
jo do wood et däm Manni klor, dat es nit ming Welt.
Refrain:
Dä Manni us Ossheim wor Schlosser am liere...
Jo, dä Manni us Ossheim wor Schlosser am liere...
it kom us em Hahnwald, hieß Ute un fing jrad eets an ze studiere.
dä Manni us Ossheim, dä hät et probeet,
hück weiß hä, dat drüvven em Hahnwald e janz ander Lüffje weht.